Nampung baru jerita Uging nyin kemari.......
Nya keno ko jerita..
Uging tu udah nyiap ngelalai kediri empu. Dini iya belalai ko kita? Din iya belalai ba puchuk tibang. Tibang tu alai kitai menya kelia nyimpan padi.Agi bisi tibang kita wai? Pemesai-mesai tibang orang kelia suba ulih alai Uging belalai.Rangkal orang kelia ukai baka kitai diatu.Suba, endang chukup pemesai rangkal kitai Iban munyi ko niang aki. Enda nemu aku engka amat kini.
Ba tibang diak meh Uging ngenat kediri.Kebuah iya belalai ba tibang ngambika enda temu antu raya pia ko dalam ati tudah tuai kediri. Ba takut meh tudah tuai kediri. Uji ngasai diriempu kitai.Nang ke nadai antu dipeda mata sereta didinga pending pan kitai takut.Anang ke enti antu nyeruga di peda mata. Enda taku nuan?
Dinga Uging munyi utai semetak ari jauh sereta tapak kaki iya bedentom-dentom sigi sigi sigi.Nyo baka munyi ‘’Tum Ketumba! Indai Ragum Nadai Diak!. Enda lama nyu majak semak tauka damping. Majak semak munyinya datai meling rumah iya. ‘’Antu raya meh nya’’ keno ko dalam ati iya.Enda mukai mukai munyi sada nyawa antu raya nya rabau ngangau ke nama Uging.’’Ni nuan Uging!! Tu aku datai deka nelan nuan segala.Nyam-nyam!!!!!!!!! ’’ ko antu raya nya manjung ngagau ke nama Uging.Munyi ke nyamai diempa meh mensia enti munyi ko antu raya tu. Baka ke bula bakani enda antu raya nemu nama Uging tu. Uging pan alit ati bakani antu raya tau ngelala nama iya. Ba nama iya cherita.
Antu raya ngangau baru’’Ni nuan Uging?!!’’. ‘’To aku,ba dapur” ko iya. Kebendar iya ukai Uging nyaut tadi. Bala sida pama ke nyaut tanya antu raya. Antu raya nyu pan meling mansang ke dapur.DIgusak gusak iya tiang dapur.Enda puas ati nanya baru antu raya’’Ni nuan Uging?!’’. ‘’TO aku ba sadau’’ ko bala pama nyaut. Ninga saut nya tadi dia antu raya meling sadau ga. Nyau bepeling peling tudah antu raya nya semalam malam. Nya tuju pama nya tadi dikena nyaut tanya antu raya. Pemaioh pama diengkah Uging ba dapur, ba sadau ba bilik meh sekeda iya.Nyu besaut saut sida pama, sampai ke antu raya nya nyau enda dapat nanya nanya agi. Nyu bungau pala antu raya.Sebening lalat bisi meh pama majak bepeling aja. Ni enda enda lama iya ke dapur enda lama ke sadau enda lama meling belah bilik nitih ke dini saut bala sida pama. Bisi ga pengamat iya, enti nyema Uging nyaut ending berupai ditemu antu raya enda pia iya neh.
Sampai ke pagi antu raya bepeling peling.Enda meh tetemu ke Uging laban alai nyu bepeling aja.Ari pan angkat tawas, antu raya pan pulai enggau mut mut iya.
‘’Ila ensepi nuan Uging, malam legi aku datai baru deka nelan nuan segala’’ ko antu raya nya.
Bah nemu antu raya nya udah angkat kaki, sereta ari pan udah ga tawas diak deh Uging murus dada.
Lapang meh ati iya keno.’Agi enseput meh aku sari tu, ’’ko iya rawan kediri empu.
(ila nampung baru enti bisi ari) part 2 Antu raya meri tinchin ajih ngagai Uging................
No comments:
Post a Comment